Mnamo Jumanne, tarehe 11 Novemba 2025, Avid Readers Forum ilifanya kikao chake cha mwisho kwa muhula wa masomo, ambapo wanajumuiya walijadili hadithi fupi “Nizikeni Papa Hapa” iliyoandikwa na Ken Walibora. Kikao hiki kiliongozwa na wasimamizi Sherine na Braxtone, na kuhudhuriwa na wanafunzi wa Kiswahili na wanachama wa klabu. Kikao kilianza kwa kusoma hadithi kwa sauti na kufuatiwa na majadiliano ya kina kuhusu dhamira, wahusika na ujumbe mpana wa kazi hii mashuhuri ya fasihi ya Kiswahili.

Kipindi cha Usomaji wa Hadithi

Hadithi “Nizikeni Papa Hapa” inasimulia maisha ya Otii, gwiji wa kandanda aliyeishi eneo la Kisumu Ndogo huko Mombasa. Otii, ambaye hapo awali aling’aa kama mchezaji wa Bandari FC na baadaye Harambee Stars, anajikuta katika hali ngumu ya maisha baada ya kujeruhiwa vibaya uwanjani. Tangu ajeruhiwe, umaarufu na hadhi yake hutoweka polepole. Serikali, viongozi wa michezo, na mashabiki waliowahi kumsifu wanamgeuka, na Otii anaishia kuishi maisha ya unyonge bila msaada wala kutambuliwa.

Katika hatua za mwisho za maisha yake, Otii anaishi bila matumaini ya kupona. Uhaba wa rasilimali, upweke na unyonge unajitokeza wazi. Wakati huu, wanachama wa Chama cha Watu wa Nyumbani wanapanga kumzika nyumbani kwao Sidindi bila kujali wosia wake wa mwisho “Nizikeni hapa.” Hii inaonyesha mgongano kati ya matakwa ya mtu binafsi na desturi zinazotawala jamii.

Ken Walibora anafichua taswira ya jamii isiyothamini mashujaa wake wanapofifia; jamii inayofuata mila hata inapopuuza heshima ya marehemu; na jamii inayokimbilia sifa za kijamii kupitia maandalizi ya mazishi ya kifahari kuliko utu na heshima ya aliyekufa. Hadithi inafika mwisho wa kusikitisha pale msafara wa mazishi unapopata ajali mbaya eneo la Tsavo na watu zaidi ya arobaini kupoteza maisha, ikidhihirisha uzito wa kauli ya Otii: “Nizikeni hapa hapa.”

Hadithi inafikia kilele cha msiba mkubwa wakati msafara unaoandamana na mwili wa Otii kuelekea Sidindi unapata ajali mbaya ya barabarani eneo la Tsavo, na watu zaidi ya arobaini wanapoteza maisha. Ajali hii inageuka kuwa ukumbusho mkali wa maneno ya Otii: “Nizikeni hapa hapa,” ikionyesha busara iliyopuuzwa na jamii isiyosikiliza sauti ya walio hatarini.

Majadiliano na Maswali

Katika mjadala uliofuata, wanakikao walichambua kwa kina dhamira na masuala yaliyofumbatwa kwenye hadithi.

Kwanza, kulijadiliwa suala la kuporomoka kwa mashujaa na unafiki wa binadamu. Washiriki waliona kuwa jamii humsifu shujaa anapong’aa, lakini humgeuka bila huruma anapofifia. Otii alisifiwa sana katika enzi za umaarufu wake, lakini alipoumia na kudhoofika, aliishia kutelekezwa na wachezaji wenzake pamoja na Wizara ya Michezo. Hili lilitambuliwa kama mfano halisi wa unafiki wa kibinadamu unaochangiwa na tamaa, manufaa na kutoweka kwa masilahi.

Pili, wanakikao walizungumzia madhara ya anasa na mapenzi ya kiholela , hasa kupitia uhusiano wa Otii na Rehema Wanjiru. Walisema kuwa Walibora anatoa onyo kuhusu mahusiano yasiyo na mipaka ambayo yalichangia kudhoofisha afya ya Otii na kumfikisha katika hatua ya hatari kiafya. Hili lilichukuliwa kama funzo kwa jamii kuhusu athari za mienendo ya mapenzi bila tahadhari.

Tatu, kulijadiliwa nafasi ya wanahabari katika kueneza habari.  Baadhi ya washiriki walishikilia kuwa wanahabari walipaswa kueleza ukweli wa kilichosababisha kifo cha Otii, kwa kuwa jamii ina haki ya kufahamishwa kikamilifu. Wengine walipinga na kusema kuwa ni vyema wanahabari wasisitize heshima kwa marehemu kama shujaa, kwa kuficha baadhi ya mambo yanayoweza kudhalilisha familia yake na kufifisha urithi wake. Hivyo, mjadala uliibua hoja muhimu kuhusu mipaka ya uandishi wa habari, maadili ya taaluma, na mizani kati ya ukweli na staha.

Aidha, wanakikao walichunguza mgongano kati ya wosia wa marehemu na desturi. Walisema kuwa kauli ya Otii, “Nizikeni hapa,” ilikuwa wito wa utu na heshima, lakini ilipuuzwa kwa sababu ya kushikamana kupita kiasi na mila ya kumzika mtu “nyumbani.” Wengine walitafakari ajali ya Tsavo kama ishara ya madhara ya kupuuza sauti ya mtu anayekaribia mwisho wa maisha yake.

Kwa jumla, majadiliano yalionyesha kuwa “Nizikeni Papa Hapa” ni hadithi inayoadibu jamii kuhusu kupotea kwa utu, madhara ya anasa, ubinafsi wa wanadamu, na uzito wa kuzingatia maadili na sauti za wale walio hatarini.

Hitimisho

Kikao kilihitimishwa na Mwalimu Kadima, aliyewashukuru washiriki kwa ushiriki wao mzuri na kwa kujitolea kwao katika vikao vyote vya Avid Readers Forum kwa kipindi chote cha muhula. Aliwasifu Sherine na Braxtone kwa uongozi wao mahiri katika kikao hiki cha mwisho na akasisitiza umuhimu wa kuendeleza tamaduni ya usomaji na uchambuzi wa maandishi ya fasihi.

Aliwatia moyo wanachama kuendelea kujihusisha na mijadala ya fasihi katika vipindi vijavyo vitakaporejea, huku akitoa shukrani za pekee kwa waliohudhuria na kuchangia mawazo yao kwa kina.